«Самұрық-Қазына» компаниялары отандық тауар өндірушілермен 11 дөңгелек үстел өткізді

«Самұрық-Қазына» отандық өндірушілермен диалогты күшейтуде. Тамызда қордың портфельдік компанияларының қатысуымен отандық тауар өндірушілермен 11 дөңгелек үстел өтті. Іс-шараға сондай-ақ «Атамекен» ҚР ҰКП, ҚР Өнеркәсіп және құрылыс министрлігі және «Қазақстан машина жасаушылар одағы» ЗТБ өкілдері қатысты. ️

Мұндай кездесулердің негізгі мақсаты – бизнеспен тікелей диалог орнату және қордың сатып алуларында отандық тауар өндірушілерді (ОТӨ) қолдау тетіктерін жетілдіру жөніндегі ұсыныстарды талқылау.

Негізгі құралдардың бірі – офтейк-келісімшарттар. 2026 жылдың бірінші жартыжылдығында жалпы сомасы 52,8 млрд теңгеге офтейк-келісімшарттар жасалды. Ұзақ мерзімді кепілді тапсырыс жаңа өндірістерді іске қосуға, қолданыстағы кәсіпорындарды кеңейтуге және бұрын импортталған өнімдерді игеруге жағдай жасайды.

Бүгінде қордың қолданыстағы Сатып алу ережелерінде отандық тауар өндірушілерді қолдаудың 16-дан астам шарасы бар. Олардың қатарында ОТӨ-ден сатып алуға басымдық беру, кемінде 30% мөлшерінде алғытөлем, 5 жұмыс күніне дейінгі мерзімде ақы төлеу, кемінде 60 күндік жеткізу мерзімі, сондай-ақ қамтамасыз етудің барлық түрлерінен босату шарасы бар.